Chapter XVI: Preface: 55 (9)

6. He upena awa. He mahae ka inoa o ia upena, eia ke ano o ia olelo. Eha manamana e komo i loko o ka maka hookahi. Ekolu kanaha ka loa. Ekolu anana ke kiekie. He kaapuni kona lawaia ana, he waa ma na kihi elua, pela no e hele kaapuni ai, a puni na ia e noho ana i kahi hookahi. No ka mea, he mea mau i keia ia o ke awa ka ai i ka limu ma kahi hookahi. Ia ia e nanea ana i ka ai limu, o kona wa ia e puni ai i ka upena a hei. He ia nui loa ke awa, he muku, he iwilei, e pela aku no kona kino.

7. Upena hahau. Eha kanaha anana ka loa o keia upena, eono iwilei kona kiekie. O kona lawaia ana, he moe pololei ka waiho ana o ka upena, a ma kekahi lihi, he moe poai pio, o ke kumu i hana ia ai peia, i hele ka ia ma ka pololei o ka upena, a hoi hope, alaila, hei i kela wahi. Hookahi kanaka nana e hahau i ke kuau o ka hoe mamua, i halulu ke kai holo ka ia. He nui loa na ia i keia upena ke hei.

8. Upena alihilele. Eono anana ka loa. He lau ma kela aoao a pela ma keia aoao. Elua kanaka ma ka upena, he anae ka ia a keia upena.

9. Upena ani. He umi anana ka loa, elua kanaka, o na wawae ke kapeku, oia kela inoa “he ani.” He anae, he weke, oama, uouoa, oia na ia.

10. Upena ohua palemo. Hookahi anana ka loa, he umi kanaka o keia upena e lawaia ai. He ohua a me ka akilolo, na ia o keia upena.

O ka pau keia o na upena a me na ia. Eia ka mea i koe, o na kanaka aho loa i ka luu moana, a me ka lawaia. Ua kaulana loa ia poe a hiki i keia la, a he mau moolelo no ko lakou e waiho nei i loko o keia lahui kanaka.

RELATING TO AMUSEMENTS.