Chapter IX: Part 9

[Sidenote: Chap. XI] Now aftre that I have told zou sum partye of folk, in the contrees before, now wille I turnen azen to my weye, for to turnen azen to this half. Thanne whoso wil go fro the lond of Galilee, of that that I have spoke, for to come azen on this half, men comen azen be Damasce, that is a fulle fayre cytee, and fulle noble, and fulle of alle merchandises, and a 3 journeyes long fro the see, and a 5 journeyes fro Jerusalem. But upon camaylles, mules, hors, dromedaries and other bestes, men caryen here merciandise thidre: and thidre comethe marchauntes with merchandise be see, from Yndee, Persee, Caldee, Ermonye, and of manye othere kyngdomes. This cytee founded Helizeus Damascus, that was Zoman and Despenser of Abraham, before that Ysaac was born: for he thoughte for to have ben Abrahames heir: and he named the toun aftre his surname Damasce. And in that place, where Damasc was founded, Kaym sloughe Abel his brother. And besyde Damasc is the Mount Seyr. In that cytee of Damasce, ther is gret plentee of welles: and with in the cytee and with oute, ben many fayre gardynes, and of dyverse frutes. Non other citee is not lyche in comparisoun to it of faire gardynes, and of faire desportes. The cytee is gret and fulle of peple, and wel walled with double walles. And there ben manye phisicyens. And seint Poul him self was there a physicyen, for to kepen mennes bodies in hele, before he was converted: and aftre that, he was phisicien of soules. And seynt Luke the Evaungelist was Disciple of seynt Poul, for to lerne phisik; and many othere. For seynt Poul held thanne scole of phisik. And neere besyde Damasce, was he converted: and aftre his conversionn, he duelte in that cytee 3 dayes, with outen sight, and with outen mete or drinke. And in tho 3 dayes he was ravisscht to hevene, and there he saughe many prevytees of oure Lord. And faste besyde Damasce, is the Castelle of Arkes, that is bothe fair and strong. From Damasce, men comen azen, be oure Lady of Sardenak, that is a 5 myle on this half Damasce; and it is sytt upon a roche, and it is a fulle faire place, and it semethe a castelle; for there was wont to ben a castelle; but it is now a fulle faire chirche. And there with inne, ben monkes and nonnes Cristene. And there is a vowt, undre the chirche, where that Cristene men duellen also: and thei han many gode vynes. And in the chirche, behynde the high awtere, in the walle, is a table of black wode, on the whiche somtyme was depeynted an ymage of oure Lady, that turnethe into flesche; but now the ymage schewethe but litille: but evermore thorewe the grace of God that table droppeth as hyt were of olyve. And there is a vessel of marbre, undre the table, to resseyve the oyle, thare of thay yeven unto pylgrymes: for it heleth of many sykenesses. And he that kepeth it clanly a yere, aftre that yere, hyt turneth yn to flesche and bloode.

By twyne the cytee of Darke and the cytee of Raphane, ys a ryvere, that men clepen Sabatorye. For on the Saturday, hyt renneth faste; and alle the wooke elles, hyt stondeth stylle, and renneth nouzt or lytel. And there ys a nother ryvere, that upon the nyzt freseth wondur faste; and uppon the day, ys noon frost sene. And so gon men by a cytee, that men clepen Beruche. And thare men gon un to the see, that schal goon un to Cypre. And thay aryve at Porte de Sure or of Tyrye; and than un to Cypre. Or elles men mowen gon from the Porte of Tyrye ryzt welle, and com not yn to Cypre; and aryve at som haven of Grece; and thanne comen men un to theis countrees, by weyes, that I have spoken of by fore.

Now have I tolde you of wayes, by the whyche men gon ferrest and longest; as by Babyloyne and Mounte Synay and other places many, thorewe the whyche londes, men turne azen to the lande of promyssyoun. Now wul y telle the ryzt way to Jerusalem. For som men wyl nouzt passe hyt, som for thay have nouzt despence of hem, for they have noon companye, and other many causes reasonables. And thare fore I telle you schorttely, how a man may goon with lytel costage and schortte tyme. A man that cometh from the londes of the weste, he goth thorewe Fraunce, Borgoyne and Lumbardye, and to Venys and to Geen, or to som other havene of the marches, and taketh a schyppe thare, and gon by see to the Isle of Gryffle; and so aryveth hem yn Grece or in Port Myroche or Valon or Duras, or at som other havene, and gon to londe, for to reste hem; and gon ayen to the see, and aryves in Cypre; and cometh nouzt yn the Ile of Roodes; and aryves at Famegoste, that ys the chefe havene of Cypre, or elles at Lamatoun. And thenne ynto the schyp ayen, and by syde the havene of Tyre, and come nouzt to lande; and so passeth he by alle the havens of that coast, until he come to Jaffe, that ys the neyest haven unto Jerusalem: for it is seven and twenty myle. And from Jaffe men goon to the cytee of Rames: and that ys but lytel thenne, and hyt is a fayre cytee. And by syde Rames, ys a fayre churche of oure Lady, whare oure Lord schewede hym to oure Lady, in thys lykenesse, that he tokeneth the Trynyte. And thare fast by, ys a churche of Seynt George, whare that hys heed was smyten of. And thanne un to the Castel Emaus; and thanne unto Mounte Joye: and from thenne, pylgrymes mowen fyrste se un to Jerusalem. And thanne un to Mount Modeyn: and thanne unto Jerusalem. And at the Mount Modeyn lythe the prophete Machabee. And overe Ramatha, ys the town of Douke; where of Amos the goude prophete was.

A nother way. For alse moche as many men ne may not suffre the savour of the see, but hadden lever to gon by londe, they that hyt be more payne; a man schal soo goon un to on of the havenes of Lumbardye, als Venys or an other; and he schal passe yn to Grece, thorwe Port Moroche, or an other; and so he schal gon un to Constantynople. And he schal so passe the wature, that ys cleped the Brace of Seynt George, that ys an arm of the see. And from thens he schal cum un to Pulveralle; and sythen un to the Castelle of Cynople. And from thens schal he gon unto Capadose, that ys a grete countree, whare that ben many grete hylles. And he schal gon thorewe Turkye, and unto the cytee of Nyke, the whyche they wonne from the Emperoure of Constantynople. And hyt is a fayre cytee, and wounder wel walled: and thare ys a ryvere, that men clepen the laye: and thare men goon by the Alpes of Aryoprynant, and by the Valez of Mallebrynez, and eke the Vale of Ernax; and so un to Anthyoche the lesse, that sytteth on the Ryehay. And there aboute ben many goude hylles and fayre, and many fayre woodes, and eke wylde beestes.

And he that wylle goon by an other way, he mote goon by the playnes of Romayne, costynge the Romayne see. Uppon that cost, ys a woundur fayre castelle, that men clepen Florathe. And whanne that a man ys oute of that ylke hylles, men passen thenne thorewe a cytee, that ys called Maryoche and Arteyse, whare that ys a grete brygge upon a ryvere of Ferne, that men clepen Fassar: and hyt ys a grete ryvere, berynge schyppes. And by syde the cytee of Damas, ys a ryvere that cometh from the mounteyne of Lybane, that men hyt callen Albane. Atte passynge of this ryvere, seynt Eustache loste hys two sones, whanne that he hadde lost hys wyffe. And yt gooth thorewe the playne of Arthadoe; and so un to the Reed See. And so men moten goon un to the cytee of phenne, and so un to the cytee of Ferne. And Antyoche ys a ful fayre cytee and wel walled. For hyt ys two myle longe and eche pylere of the brygge thare ys a goud toure. And thys ys the beest cytee of the kyngdom of Surrye. And from Antyoche, men moten so forth goon un to the cytee of Lacuthe; and thanne un to Geble; and thanne un tyl Tourtous: and thare by ys the lande of Cambre, whare that ys a stronge castelle, that men clepen Maubeke. And from Tourtouse men goon up to Thryple, uppon the see. And uppon the see, men goon unto Deres; and thare ben two weyes un to Jerusalem: Uppon the lyfte way, men goon fyrst un to Damas, by Flome Jordane: uppon the ryzt syde, men goon thorewe the lande of Flagam, and so un to the cytee of Cayphas: of the whiche Cayphas was Lord: and som clepeth hyt the castelle Pellerynez: And from thens ys foure dayes journeyes un to Jerusalem and they goon thorewe Cesarye Phylyppum and Jaffe and Ramys and Emaux, and so unto Jerusalem.

Now have I told yow som of the wayes, by the land, and eke by water, how that men mowen goon unto Jerusalem: they that hyt be so, that there been many other wayes, that men goon by, aftur countrees, that thay comen fram, nevere the lasse they turne alle un tylle an ende. Yet is thare a way, alle by lande, un to Jerusalem, and pass noon see; that ys from Fraunce or Flaundres; but that way ys fulle lange and perylous, of grete travayle; and thare fore fewe goon that ylke way. And who so gooth that, he mote goon thorewe Almayn and Pruys; and so un to Tartarye. This Tartarye ys holden of the great Chan, of whom y schal speke more afterwarde. For thydur lasteth hys Lordschup. And the Lordes of Tartarye yeldeth unto the grete Chan trybute. Thys ys a ful ille lande, and a sondye, and wel lytel fruyt beryng. For thare groweth lytel goude of corne or wyn, ne benes ne pese: but beestes ben thare y nowe, and that ful grete plente. And thare ete thay nought but flesche with outen brede; and thay soupe the brothe there of: and also thay drynke the mylk. And alle manere of wylde beestes they eten, houndes, cattes, ratouns, and alle othere wylde bestes. And thei have no wode, or elle lytylle. And therfore thei warmen and sethen here mete with hors dong and cow dong, and of other bestes dryed azenst the sonne. And princes and othere eten not, but ones in the day; and that but lytille. And thei ben righte foule folk and of evyl kynde. And in somer, be alle the contrees, fallen many tempestes and many hydouse thondres and leytes, and slen meche peple and bestes also, fulle often tyme. And sodeynly is there passynge hete, and sodeynly also passynge cold. And it is the foulest contree, and the most cursed, and the porest, that men knowen. And here prince, that governethe that contree, that thei clepen Batho, duellethe at the cytee of Orda. And treuly no gode man scholde not duellen in that contre. For the lond and the contree is not worthi houndes to dwelle inne. It were a gode contree to sowen inne thristelle and breres and broom and thornes; and for no other thing is it not good. Natheless there is gode londe in sum place; but it is pure litille, as men seyn. I have not ben in that contree, ne be tho weyes: but I have ben at other londes, that marchen to tho contrees; and in the lond of Russye, and in the lond of Nyflan, and in the reme of Crako, and of Letto, and in the reme of Daresten, and in manye other places, that marchen to the costes: but I wente never be that weye to Jerusalem; wherfore I may not wel telle zou the manere. But zif this matiere plese to ony worthi man, that hathe gon be that weye, he may telle it, zif him lyke; to that entent, that tho that wole go by that weye, and maken here viage be tho costes, mowen knowen what weye is there. For no man may passe be that weye godely, but in time of wyntir, for the perilous watres, and wykkede mareyes that ben in tho contrees; that no man may passe, but zif it be strong frost, and snowe aboven. For zif the snow ne were, men myght not gon upon the yse, ne hors ne carre nouther. And it is wel a 3 journeys of suche weye, to passe from Prusse to the lond of Sarazin habitable. And it behovethe to the Cristene men, that schulle werre azen hem every zeer, to bere here vitaylles with hem: for thei schulle fynde there no good. And than most thei let carye here vitaylle upon the yse, with carres that have no wheeles, that thei clepen scleyes. And als longe as here vitaylles lasten, thei may abide there, but no longer. For there schulle they fynde no wight that will selle hem ony vitaille or ony thing. And whan the spyes seen ony Cristene men comen upon hem, thei rennen to the townes, and cryen with a lowd voys, Kerra, Kerra, Kerra; and than anon thei armen hem and assemblen hem to gydere.

And zee schulle undirstonde, that it fresethe more strongly in tho contrees than on this half; and therefore hathe every man stewes in his hous, and in tho stewes thei eten and don here occupatiouns, alle that they may. For that is at the northe parties, that men clepen the septentrionelle, where it is alle only cold. For the sonne is but lytille or non toward tho contreyes: and therefore in the Septentryon, that is verry northe, is the lond so cold, that no man may duelle there: and in the contrarye, toward the southe, it is so hoot, that no man ne may duelle there: because that the sonne, whan he is upon the southe, castethe his bemes alle streghte upon that partye.

Of the Customes of Sarasines, and of hire Lawe; and how the Soudan arresond
me, Auctour of this Book. And of the begynnynge of Machomete.

[Sidenote: Cap. XII.] Now because that I have spoken of Sarazines and of here contree, now zif zee wil knowe a party of here lawe and of here beleve, I schalle telle zou, aftre that here book, that is clept Alkaron, tellethe. And sum men clepen that book Meshaf: and sum men clepen it Harme, aftre the dyverse langages of the contree. The whiche book Machamete toke hem. In the whiche boke, among other thinges, is written, as I have often tyme seen and radd, that the gode shulle gon to paradys, and the evele to helle: and that beleven alle Sarazines. And zif a man aske hem, what paradys thei menen; thei seyn, to paradys, that is a place of delytes, where men schulle fynde alle maner of frutes, in alle cesouns, and ryveres rennynge of mylk and hony, and of wyn, and of swete watre; and that thei schulle have faire houses and noble, every man aftre his dissert, made of precyous stones, and of gold, and of sylver; and that every man schalle have 80 wyfes, alle maydenes; and he schalle have ado every day with hem, and zit he schalle fynden hem alle weys maydenes. Also thei beleeven and speken gladly of the Virgine Marie and of the Incarnacioun. And thei seyn, that Marye was taughte of the angel; and that Gabrielle seyde to hire, that sche was forchosen from the begynnynge of the world; and that he schewed to hire the incarnacioun of Jesu Crist; and that sche conceyved and bare child, mayden: and that wytnessethe here boke. And they seyn also, that Jesu Crist spak als sone as he was born; and that he was an holy prophete and a trewe, in woord and dede, and meke and pytous and rightefulle and with outen ony vyce. And thei seyn also, that whan the angel schewed the Incarnacioun of Crist unto Marie, sche was zong, and had gret drede. For there was thanne an enchantour in the contree, that deled with wycche craft, that men clepten Taknia, that he his enchauntementes cowde make him in lyknesse of an angel, and wente often tymes and lay with maydenes: and therfore Marie dredde, lest it hadde ben Taknia, that cam for to desceyve the maydenes. And therfore sche conjured the angel, that he scholde telle hire, zif it were he or no. And the angel answerde and seyde, that sche scholde have no drede of him: for he was verry messager of Jesu Crist. Also here book seythe, that whan that sche had childed undre a palme tree, sche had gret schame, that sche hadde a child; and sche grette, and seyde, that sche wolde that sche hadde ben ded. And anon the child spak to hire and comforted hire, and seyde, Modir, ne dismaye the noughte; for God hathe hidd in the his prevytees, for the salvacioun of the world. And in othere many places seythe here Alkaron, that Jesu Crist spak als sone as he was born. And that book seythe also, that Jesu was sent from God alle myghty, for to ben myrour and ensample and tokne to alle men. And the Alkaron seythe also of the day of doom, how God schal come to deme alle maner of folk; and the gode he schalle drawen on his syde, and putte hem into blisse; and the wykkede he schal condempne to the peynes of helle. And amonges alle prophetes, Jesu was the most excellent and the moste worthi, next God; and that he made the Gospelles, in the whiche is gode doctryne and helefulle, fulle of charitee and sothefastnesse, and trewe prechinge to hem that beleeven in God; and that he was a verry prophete, and more than a prophete; and lyved withouten synne, and zaf syghte to the blynde, and helede the lepres, and reysed dede men, and steyghe to hevene. And whan thei mowe holden the boke of the Gospelles of oure Lord written, and namely, _Missus est Angelus Gabriel_; that Gospel, thei seyn, tho that ben lettred, often tymes in here orisouns, and thei kissen it and worschipen it, with gret devocioun. Thei fasten an hool monethe in the zeer, and eten noughts but be nyghte, and thei kepen hem fro here wyfes alle that monethe: but the seke men be not constreyned to that fast. Also this book spekethe of Jewes; and seythe, that thei ben cursed; for thei wolde not beleven, that Jesu Crist was comen of God; and that thei lyeden falsely on Marie and on hire sone Jesu Crist, seyenge that thei hadden crucyfyed Jesu the sone of Marie: for he was nevere crucyfyed, as thei seyn; but that God made him to stye up to him with outen dethe, and with outen anoye: but he transfigured his lyknesse into Judas Scariothe, and him crucyfyden the Jewes, and wenden that it had ben Jesus: but Jesus steyge to hevenes alle quyk; and therfore thei seyn, that the Cristene men erren and han no gode knowleche of this, and that thei beleeven folyly and falsly, that Jesu Crist was crucyfyed. And they seyn zit, that and he had ben crucyfyed, that God had don azen his rightewisnesse, for to suffre Jesu Crist, that was innocent, to ben put upon the Cros, with outen gylt. And in this article thei seyn, that wee faylen, and that the gret rightewisnesse of God ne myghte not suffre so gret a wrong. And in this, faylethe here feythe. For thei knoulechen wel, that the werkes of Jesu Crist ben gode, and his wordes and his dedes and his doctryne by his Gospelles, weren trewe and his meracles also trewe; and the blessed Virgine Marie is good, and holy mayden, before and aftre the birthe of Jesu Crist; and that alle tho, that beleven perfitely in God, schul ben saved. And because that thei gon so nye oure feythe, thei ben lyghtly converted to Cristene lawe, whan men prechen hem and schewe hem distynctly the lawe of Jesu Crist, and tellen hem of the prophecyes. And also thei seyn, that thei knownen wel, be the prophecyes, that the lawe of Machomete schalle faylen, as the lawe of the Jewes dide, and that the lawe of Cristine peple schalle laste to the day of doom. And zif ony man aske hem, what is here beleeve; thei answeren thus, and in this forme, Wee beleven God formyour of hevene and of erthe and of alle othere things, that he made. And we beleven of the day of doom, and that every man schalle have his meryte, aftre he hathe disserved. And we beleve it for sothe, alle that God hathe seyd be the mouthes of his prophetes. Also Machomet commanded in his Alkaron, that every man scholde have 2 wyfes or 3 or 4; but now thei taken unto 9, and of lemmanes als manye as he may susteyne. And zif ony of here wyfes mys beren hem azenst hire husbonde, he may caste hire out of his house; and departe from him, and take another: but he schalle departe with hire his godes. Also whan men speken to hem, of the Fadre and of the Sone and of the Holy Gost, thei seyn, that thei ben 3 persones; but not o God. For here Alkaron spekethe not of the Trynyte. But thei seyn wel, that God hathe speche, and elle where he dowmb; and God hathe also a Spirit, thei knowen wel, for elle thei seyn, he were not in lyve. And whan men speken to hem of the Incarnacioun, how that be the word of the angel, God sente his wysdom in to erthe, and enumbred him in the Virgyne Marie: and be the Woord of God, schulle the dede ben reysed, at the day of doom; thei seyn, that it is sothe, and that the Woord of God hathe gret strengthe. And thei seyn, that whoso knew not the Woord of God, he scholde not knowe God. And thei seyn also, that Jesu Crist is the Woord of God; and so seythe here Alkaron, where it seythe, that the angel spak to Marie and seyde, Marie, God schalle preche the Gospel be the woord of his mowthe, and his name schalle be clept Jesu Crist. And thei seyn also, that Abraham was frend to God, and that Moyses was famileer spekere with God; and Jesu Crist was the Woord and the Spirit of God; and that Machomete was right messager of God. And thei seyh, that of theise 4, Jesu was the most worthi and the most excellent and the most gret; so that thei han many gode articles of oure feythe, alle be it that thei have no parfite lawe and feythe, as Cristene men han; and therfore ben thei lightly converted; and namely, tho that undirstonden the Scriptures and the prophecyes. For thei han Gospelles and the prophecyes and the Byble, writen in here langage. Wherfore thei conne meche of Holy Wrytt, but thei undirstonde it not, but aftre the lettre: and so don the Jewes; for thei undirstonde not the lettre gostly, but bodyly; and therfore ben thei repreved of the wise, that gostly understonden it. And therfore seythe seynt Poul; _Litera occidit; Spiritus vivificat_. Also the Sarazines seyn, that the Jewes ben cursed: for thei han defouled the lawe, that God sente hem be Moyses. And the Cristene ben cursed also, as thei seyn: for their kepen not the commandementes and the preceptes of the Gospelle, that Jesu Crist taughte hem. And therfore I schalle telle zou, what the Soudan tolde me uppn a day, in his chambre. He leet voyden out of his chambre alle manner of men, lordes aad othere: for he wolde speke with me in conseille. And there he asked me, how the Cristene men governed hem in oure contree. And I seyde him, righte wel: thonked be God. And he seyde me, treulyche, nay: for zee Cristene men ne recthen righte noghte how untrewly to serve God. Ze scholde zeven ensample to the lewed peple, for to do wel; and zee zeven hem ensample to don evylle. For the comownes, upon festyfulle dayes, whan thei scholden gon to chirche to serve God, than gon thei to tavernes, and ben there in glotony, alle the day and alle nyghte, and eten and drynken, as bestes that have no resoun, and wite not whan thei have y now. And also the Cristene men enforcen hem, in alle maneres that thei mowen, for to fighte, and for to desceyven that on that other. And there with alle thei ben so proude, that thei knowen not how to ben clothed; now long, now schort, now streyt, now large, now swerded, now daggered, and in alle manere gyses. Thei scholden ben symple, meke and trewe, and fulle of almes dede, as Jhesu was, in whom thei trowe: but thei ben alle the contrarie, and evere enclyned to the evylle, and to don evylle. And thei ben so coveytous, that for a lytylle sylyer, thei sellen here doughtres, here sustres and here owne wyfes, to putten hem to leccherie. And on with drawethe the wif of another; and non of hem holdethe feythe to another; but thei defoulen here lawe, that Jhesu Crist betook hem to kepe, for here salvacioun. And thus for here synnes, han thei lost alle this lond, that wee holden. For, for hire synnes there God hathe taken hem in to oure hondes, noghte only be strengthe of our self, but for here synnes. For wee knowen wel in verry sothe, that whan zee serve God, God wil hepe zou: and whan he is with zou, no man may be azenst you. And that knowe we wel, be oure prophecyes, that Cristene men schulle wynnen azen this lond out of oure hondes, whan thei serven God more devoutly. But als longe als thei ben of foule and of unclene lyvynge, (as thei ben now) wee have no drede of hem, in no kynde: for here God wil not helpen hem in no wise. And than I asked him, how he knew the state of Cristene men. And he answered me, that he knew alle the state of the comounes also, be his messangeres, that he sente to alle londes, in manere as thei weren marchauntes of precyous stones, of clothes of gold and of othere things; for to knowen the manere of every contree amonges Cristene men. And than he leet clepe in alle the lordes, that he made voyden first out of his chambre; and there he schewed me 4, that weren grete lordes in the contree, that tolden me of my contree, and of many othere Cristene contrees, als wel as thei had ben of the same contree: and thei spak Frensche righte wel; and the Sowdan also, where of I had gret marvaylle. Alas! that it is gret sclaundre to oure feythe and to oure lawe, whan folk that ben with outen lawe, schulle repreven us and undernemen us of oure synnes. And thei that scholden ben converted to Crist and to the lawe of Jhesu, be oure gode ensamples and be oure acceptable lif to God, and so converted to the lawe of Jhesu Crist, ben thorghe oure wykkednesse and evylle lyvynge, fer fro us and straungeres fro the holy and verry beleeve, schulle thus appelen us and holden us for wykkede lyveres and cursed. And treuly thei sey sothe. For the Sarazines ben gode and feythfulle. For thei kepen entierly the commaundement of the holy book Alkaron, that God sente hem be his messager Machomet; to the whiche, as thei seyne, seynt Gabrielle the aungel often tyme tolde the wille of God. And zee schulle undirstonde, that Machamote was born in Arabye, that was first a pore knave, that kept cameles, that wenten with marchantes fur marchandize; and so befelle, that he wente with the marchandes in to Egipt: and thei weren than Cristene, in tho partyes. And at the desertes of Arabye, he wente in to a chapelle, where a Eremyte duelte. And when he entred in to the chapelle, that was but a lytille and a low thing, and had but a lityl dore and a low, than the entree began to wexe so gret and so large and so highe, as thoughe it had ben of a gret mynstre, or the zate of a paleys. And this was the firste myracle, the Sarazins seyn, that Machomete dide in his zouthe. Aftre began he for to wexe wyse and riche; and he was a gret astronomer: and aftre he was governour and prince of the lond of Cozrodane; and he governed it fully wisely, in suche manere, that whan the prince was ded, he toke the lady to wyfe, that highte Gadridge. And Machomete felle often in the grete sikenesse, that men callen the fallynge evylle: wherfore the lady was fulle sorry, that evere sche toke him to husbonde. But Machomete made hire to beleeve, that alle tymes, whan he felle so, Gabriel the angel cam for to speke with him; and for the gret lighte and brightnesse of the angelle, he myghte not susteyne him fro fallynge. And therfore the Sarazines seyn, that Gabriel cam often to speke with him. This Machomete regned in Arabye, the zeer of oure Lord Jhesu Crist 610; and was of the generacioun of Ysmael, that was Abrahames sone, that he gat upon Agar his chamberere. And therfere ther ben Sarazines, that ben clept Ismaelytenes; and summe Agaryenes, of Agar: and the othere propurly ben clept, Sarrazines, of Sarra: and summe ben clept Moabytes, and summe Amonytes; fro the 2 sones of Lothe, Moab and Amon, that he begat on his doughtres, that weren aftirward grete erthely princes. And also Machomete loved wel a gode heremyte, that duelled in the desertes, a myle fro Mount Synay, in the weye that men gon fro Arabye toward Caldee, and toward Ynde, o day journey fro the See, where the marchauntes of Yenyse comen often for marchandise. And so often wente Machomete to this heremyte, that alle his men weren wrothe: for he wolde gladly here this heremyte preche, and make his men wake alle nyghte: and therfore his men thoughten to putte the heremyte to dethe: and so it befelle upon a nyght, that Machomete was dronken of gode wyn, and he felle on slepe; and his men toke Machometes swerd out of his schethe, whils he slepte, and there with thei slowghe this heremyte: and putten his swerd alle blody in his schethe azen. And at morwe, whan he fond the heremyte ded, he was fulle sory and wrothe, and wolde have don his men to dethe: but they alle with on accord seyd, that he him self had slayn him, when he was dronken, and schewed him his swerd alle blody: and he trowed, that thei hadden seyd sothe. And than he cursed the wyn, and alle tho that drynken it. And therfore Sarrazines, that be devout, drynken nevere no wyn: but sume drynken it prevyly. For zif thei dronken it openly, thei scholde ben repreved. But thei drynken gode beverage and swete and norysshynge, that is made of galamelle: and that is that men maken sugar of, that is of righte gode savour: and it is gode for the breest. Also it befallethe sumtyme, that Cristene men becomen Sarazines, outher for povertee, or for symplenesse, or else for here owne wykkednesse. And therfore the archiflamyn or the flamyn, as oure erchebisshop or bisshopp, whan he receyvethe hem, seythe thus, _La ellec, Sila. Machomete rores alla_; that is to seye, _There is no God but on, and Machomete his messager_.

Of the Londes of Albanye, and of Libye. Of the Wisshinges, for Wacchinge of
the Sperhauk; and of Noes Schippe.

[Sidenote: Cap. XIII.] Now sithe I have told zou beforn of the Holy Lond, and of that contree abouten, and of many weyes for to go to that lond, and to the Mount Synay, and of Babyloyne the more and the lesse, and to other places, that I have spoken beforn; now is tyme, zif it lyke zou, for to telle zou of the marches and iles, and dyverse bestes, and of dyverse folk bezond theise marches. For in tho contrees bezonden, ben many dyverse contrees, and many grete kyngdomes; that ben departed be the 4 flodes, that comen from Paradys terrestre. For Mesopotayme and the Kyngdom of Caldee and Arabye, ben betwene the 2 ryveres of Tygre and of Eufrates. And the kyngdom of Mede and of Persye, ben betwene the ryveres of Nile and of Tigres. And the kyngdom of Syrie, where of I have spoken beforn, and Palestyne and Phenycie, ben betwene Eufrates and the See Medyterrane: the whiche see durethe in lengthe, fro Mayrok, upon the See of Spayne, unto the grete See; so that it lastethe bezonde Costantynople 3040 myles of Lombardye. And toward the see occyan in Ynde, is the kyngdom of Shithie, that is alle closed with hilles. And aftre undre Schithie, and fro the See of Caspie, unto the Flom Thainy, is Amazoyne, that is the lond of femynye, where that no man is, but only alle wommen. And aftre is Albanye, a fulle grete reme. And it is clept Albanye, because the folk ben whitere there, than in other marches there abouten. And in that contree ben so gret houndes and so stronge, that thei assaylen lyouns, and sleu hem. And thanne aftre is Hircanye, Bactrye, Hiberye, and many other kyngdomes. And betwene the Rede See and the see occyan, toward the southe, is the kyngdom of Ethiope, and of Lybye the hyere. The which lond of Lybye, (that is to seyne Libye the lowe) that begynnethe at the See of Spayne, fro thens where the Pyleres of Hercules ben, and durethe unto aneyntes Egipt and towards Ethiope. In that contree of Libye, is the see more highe than the lond; and it semethe that it wolde covere the erthe, and natheles zit it passethe not his markes. And men seen in that contre a mountayne, to the whiche no man comethe. In this lond of Libye, whoso turnethe toward the est, the schadewe of him self is on the right syde: and here in oure contree, the schadwe is on the left syde. In that See of Libye, is no fissche: for thei mowe not lyve ne dure, for the gret hete of the sonne; because that the watre is evermore boyllynge, for the gret hete. And many othere londes there ben, that it were to long to tellen or to nombren: but of sum parties I schal speke more pleynly here aftre.

Whoso wil thanne gon toward Tarterie, toward Persie, toward Caldee, and toward Ynde, he most entre the see, at Gene or at Venyse or at sum other havene, that I have told zou before. And than passe men the see, and arryven at Trapazond, that is a gode cytee; and it was wont to ben the havene of Pountz. There is the havene of persanes and of medaynes and of the marches there bezonde. In that cytee lythe Seynt Athanasie, that was Bishopp of Alisandre, that made the Psalm _Quicunque vult_. This Athanasius was a gret Doctour of Dyvynytee: and because that he preched and spak so depely of Dyvynytee and of the Godhede, he was accused to the Pope of Rome, that he was an Heretyk. Wherfore the Pope sente aftre hym, and putte him in presoun: and whils he was in presoun, he made that Psalm, and sente it to the Pope, and seyde: that zif he were an heretyk, that was that heresie; for that, he seyde, was his beleeve. And whan the Pope saughe it, and had examyned it, that it was parfite and gode, and verryly oure feythe and oure beleeve, he made him to ben delyvered out of presoun, and commanded that Psalm to ben seyd every day at Pryme: and so he held Athanasie a gode man. But he wolde nevere go to his bisshopriche azen, because that thei accused him of heresye. Trapazond was wont to ben holden of the Emperour of Costantynople: but a gret man, that he sente for to kepe the contree azenst the Turkes, usurped the lond, and helde it to himself, and cleped him Emperour of Trapazond.

And from thens, men gon thorghe litille Ermonye. And in that contree is an old castelle, that stont upon a roche, the whiche is cleped the Castelle of the Sparrehawk, that is bezonde the cytee of Layays, beside the town of Pharsipee, that belongethe to the lordschipe of Cruk; that is a riche lord and a gode Cristene man; where men fynden a sparehauk upon a perche righte fair, and righte wel made; and a fayre lady of fayrye, that kepethe it. And who that wil wake that sparhauk, 7 dayes and 7 nyghtes, and as sum men seyn, 3 dayes and 3 nyghtes, with outen companye, and with outen sleep, that faire lady schal zeven him, whan he hathe don, the first wyssche, that he wil wyssche, of erthely thinges: and that hathe been proved often-tymes. And o tyme befelle, that a kyng of Ermonye, that was a worthi knyght and doughty man and a noble prince, woke that hauk som tyme: and at the ende of 7 dayes and 7 nyghtes, the lady cam to him, and bad him wisschen: for he had wel disserved it. And he answerde, that he was gret Lord y now, and wel in pees, and hadde y nowghe of worldly ricchesse: and therfore he wolde wisshe non other thing, but the body of that faire lady, to have it at his wille. And sche answerde him, that he knew not what he asked; and seyde, that he was a fool, to desire that he myghte not have; for sche seyde, that he scholde not aske, but erthely thing: for sche was non erthely thing, but a gostly thing. And the kyng seyde, that he ne wolde asken non other thing. And the lady answerde, sythe that I may not withdrawe zou fro zoure lewed corage, I schal zeve zou with outen wysschinge, and to alle hem that schulle com of you. Sire kyng, zee schulle have werre withouten pees, and alle weys to the 9 degree, zee schulle ben in subjeccioun to zoure enemyes; and zee schulle ben nedy of alle godes. And nevere sithen, nouther the kyng of Ermoyne, ne the contree, weren never in pees, ne thei hadden never sithen plentee of godes; and thei han ben sithen alle weyes undre tribute of the Sarrazines. Also the sone of a pore man woke that hauke, and wisshed that he myghte cheve wel, and to ben happy to merchandise. And the lady graunted him. And he becaam the most riche and the most famouse marchaunt, that myghte ben on see or on erthe. And he becam so riche, that he knew not the 1000 part of that he hadde: and he was wysere, in wisschynge, than was the king. Also a knyght of the temple wooke there; and wyssched a purs evere more fulle of gold: and the lady graunted him. But sche seyde him, that he had asked the destruccioun of here ordre; for the trust and the affiance of that purs, and for the grete pryde, that they scholde haven: and so it was. And therfore loke, he kepe him wel, that schalle wake: for zif he slepe, he is lost, that nevere man schalle seen him more. This is not the righte weye for to go to the parties, that I have nempned before; but for to see the merveyle, that I have spoken of.

And therfore who so wil go right weye, men gon fro Trapazond toward Ermonye the gret, unto a cytee that is clept Artyroun, that was wont to ben a gode cytee and a plentyous; but the Turkes han gretly wasted it. There aboute growethe no wyn ne fruyt, but litylle or elle non. In this lond, is the erthe more highe than in ony other; and that makethe gret cold. And there hen many gode watres, and gode welles, that comen undre erthe, fro the flom of paradys, that is clept Eufrates, that is a jorneye besyde that cytee. And that ryvere comethe towardes Ynde, undre erthe, and restorethe into the lond of Altazar. And so passe men be this Ermonie, and entren the see of Persie. Fro that cytee of Artyroun go men to an hille, that is clept Sabissocolle. And there besyde is another hille, that men clepen Ararathe: but the Jewes clepen it Taneez; where Noes schipp rested, and zit is upon that montayne: and men may seen it a ferr, in cleer wedre: and that montayne is wel a 7 myle highe. And sum men seyn, that thei han seen and touched the schipp; and put here fyngeres in the parties, where the feend went out, whan that Noe seyde _Benedicite_. But thei that seyn suche wordes, seyn here wille: for a man may not gon up the montayne, for gret plentee of snow that is alle wayes on that montayne, nouther somer ne wynter: so that no man may gon up there; ne never man dide, sithe the tyme of Noe; saf a monk, that, be the grace of God, brought on of the plankes doun: that zit is in the mynstere, at the foot of the montayne. And besyde is the cytee of Dayne, that Noe founded. And faste by is the cytee of Any, in the whiche were 1000 chirches. But upon that montayne, to gon up, this monk had gret desire; and so upon a day, he wente up: and whan he was upward the 3 part of the montayne, he was so wery, that he myghte no ferthere, and so he rested him, and felle o slepe; and whan he awook, he fonde him self lyggynge at the foot of the montayne. And than he preyede devoutly to God, that he wolde vouche saf to suffre him gon up. And an angelle cam to him, and seyde, that he scholde gon up; and so he dide. And sithe that tyme never non. Wherfore men scholde not beleeve such woordes.

Fro that montayne go men to the cytee of Thauriso, that was wont to ben clept Taxis, that is a fulle fair cytee, and a gret, and on of the beste, that is in the world, for marchandise: and it is in the lond of the Emperour of Persie. And men seyn, that the Emperour takethe more gode, in that cytee, for custom of marchandise than dothe the ricchest Cristene kyng of alle his reme, that livethe. For the tolle and the custom of his marchantes is with outen estymacioun to ben nombred. Beside that cytee, is a hille of salt; and of that salt, every man takethe what he will, for to salte with, to his nede. There duellen many Cristene men, undir tribute of Sarrazines. And fro that cytee, men passen be many townes and castelles, in goynge toward Ynde, unto the cytee of Sadonye, that is a 10 journeyes fro Thauriso; and it is a fulle noble cytee and a gret. And there duellethe the Emperour of Persie, in somer: for the contree is cold y now. And there ben gode ryveres, berynge schippes. Aftre go men the weye toward Ynde, be many iorneyes, and be many contreyes, unto the cytee, that is clept Cassak, that is a fulle noble cytee, and a plentyous of cornes and wynes, and of alle other godes. This is the cytee, where the 3 kynges metten to gedre, whan thei wenten to sechen oure Lord in Bethtem, to worschipe him, and to presente him with gold, ensence, and myrre. And it is from that cytee to Bethleem 53 iourneyes. Fro that cytee, men gon to another cytee, that is clept Bethe, that is a iourneye fro the see, that men clepen the gravely see. That is the best cytee, that the Emperour of Persie hathe, in alle his lond. And thei clepen it there Chardabago; and others clepen it Vapa. And the Paynemes seyn, that no Cristene man may not longe duelle, ne enduren with the lif, in that cytee: but dyen with in schort tyme; and no man knowethe not the cause. Aftre gon men, be many cytees and townes, and grete contrees, that it were to longe to telle, unto the cytee of Cornaa, that was wont to be so gret, that the walles abouten holden 25 myle aboute. The walks schewen zit: but it is not alle enhabited. From Cornaa, go men be many londes, and many cytees and townes, unto the lond of Job: and there endethe the lond of the Emperour of Persie.

Of the Lond of Job; and of his Age. Of the Aray of men of Caldee. Of the
Lond where Wommen duellen with outen companye of men. Of the knouleche
and vertues of the verray Dyamant.

[Sidenote: Chap. XIV.] Aftre the departynge fro Cornaa, men entren in to the lond of Job, that is a fulle faire contree, and a plentyous of alle godes. And men clepen that lond the lond of Sweze. In that lond is the cytee of Theman. Job was a Payneem, and he was Are of Gosre his sone, and held that lond, as prynce of that contree and he was so riche, that he knew not the hundred part of his godes. And alle thoughe he were a Payneem, natheless he served wel God, aftre his lawe: and oure Lord toke his service to his plesance. And whan he felle in poverte, he was 78 zeer of age. And aftre, whan God had preved his pacyence, and that it was so gret, he broughte him azen to richesse, and to hiere estate than he was before. And aftre that he was kyng of Ydumye, aftre Kyng Esau. And whan he was kyng, he was clept Jobab. And in that kyngdom, he lyvede aftre 170 zere: and so he was of age, whan he dyede, 248 zeer. In that lond of Job, there nys no defaute of no thing, that is nedefulle to mannes body. There ben hilles, where men getten gret plentee of manna, in gretter habundance, than in ony other contree. This manna is clept bred of aungelles; and it is a white thing, that is fulle swete and righte delicyous, and more swete than hony or sugre; and it comethe of the dew of hevene that fallethe upon the herbes, in that contree; and it congelethe and becomethe alle white and swete: and men putten it in medicynes for rich men, to make the wombe lax, and to purge evylle blood: for it clensethe the blode, and puttethe out malencoyle. This lond of Job marchethe to the kyngdom of Caldee. This lond of Caldee is fulle gret: and the langage of that contree is more gret in sownynge, that it is in other parties bezonde the see. Men passen to go bezond, be the Tour of Babiloyne the grete: of the whiche I have told zou before, where that alle the langages weren first chaunged. And that is a 4 jorneyes fro Caldee. In that reme, ben faire men, and thei gon fulle nobely arrayed in clothes of gold, or frayed and apparayled with grete perles and precyous stones, fulle nobely: and the wommen ben righte foule and evylle arrayed; and thei gon alle bare fote, and clothed in evylle garnementes, large and wyde, but thei ben schorte to the knees; and longe sleves doun to the feet, lyche a monkes frokke; and here sleves ben hongyng aboute here schuldres: and thei ben blake women, foule and hidouse; and treuly as foule as thei ben, als evele thei ben. In that kyngdom of Caldee, in a cytee, that is cleped Hur, duelled Thare, Abrahames fadre: and there was Abraham born: and that was in that tyme, that Nunus was Kyng of Babiloyne, of Arabye and of Egypt. This Nunus made the cytee of Nynyvee, the whiche that Noe had begonne before: and be cause that Nunus performed it, he cleped it Nynyve, aftre his owne name. Ther lythe Thobye the prophete, of whom Holy Writt spekethe offe. And fro that cytee of Hur Abraham departed, be the commandement of God, fro thens, aftre the dethe of his fadre; and ladde with him Sarra his wife and Lothe his brotheres sone, because that he hadde no child. And thei wenten to duelle in the lond of Chanaan, in a place, that is clept Sychem. And this Lothe was he, that was saved, whan Sodom and Gomorre and the othere cytees weren brent and sonken doun to helle; where that the dede see is now, as I have told zou before. In that lond of Caldee, thei han here propre langages, and here propre lettres.