Chapter VII: Part 7

Betheleem is a litylle cytee, long and narwe and well walled, and in eche syde enclosed with gode dyches; and it was wont to ben cleped Effrata; as Holy Writt seythe, _Ecce audivimus cum in Effrata_; that is to seye, _Lo, we herde him in Effrata_. And toward the est ende of the cytee, is a fulle fair chirche and a gracyouse; and it hathe many toures, pynacles and corneres, fulle stronge and curiously made: and with in that chirche ben 44 pyleres of marble, grete and faire. And betwene the cytee and the chirche in the felde floridus; that is to seyne, the feld florisched: for als moche as a fayre mayden was blamed with wrong, and sclaundred, that sche hadde don fornycacioun; for whiche cause sche was demed to the dethe, and to be brent in that place, to the whiche sche was ladd. And as the fyre began to brenne about hire, sche made hire preyeres to oure Lord, that als wissely as sche was not gylty of that synne, that he wold helpe hire, and make it to be knowen to alle men, of his mercyfulle grace. And whan sche hadde thus seyd, sche entred in to the fuyer: and anon was the fuyr quenched and oute: and the brondes that weren brennynge, becomen rede roseres; and the brondes that weren not kyndled, becomen white roseres, fulle of roses. And theise weren the first roseres and roses, both white and rede, that evere ony man saughe. And thus was this mayden saved be the grace of God. And therfore is that feld clept the feld of God florysscht: for it was fulle of roses. Also besyde the queer of the chirche, at the right syde, as men comen dounward 16 greces, [Footnote: Steps.] is the place where oure Lord was born, that is fulle welle dyghte of marble, and fulle richely peynted with gold, sylver, azure, and other coloures. And 3 paas besyde, is the crybbe of the ox and the asse. And besyde that, is the place where the sterre fell, that ladde the 3 kynges, Jaspar, Melchior and Balthazar: but men of Grece clepen hem thus, Galgalathe, Malgalathe and Saraphie: and the Jewes clepen in this manere, in Ebrew, Appelius, Amerrius and Damasus. Theise 3 kynges offreden to oure Lord, gold, ensence and myrre: and thei metten to gedre, thorghe myracle of God; for thei metten to gedre in a cytee in Ynde, that Men clepen Cassak, that is 53 journeyes fro Betheleem; and thei weren at Betheleem the 13 day. And that was the 4 day aftre that thei hadden seyn the sterre, whan they metten in that cytee: and thus thei weren in 9 dayes, fro that cytee at Betheleem; and that was gret myracle. Also undre the cloystre of the chirche, be 18 degrees, at the righte syde, is the charnelle of the innocentes, where here bones lyzn. And before the place where oure Lord was born, is the tombe of Seynt Jerome, that was a preest and a cardynalle, that translatede the Bible and the psaultere from Ebrew in to Latyn: and witheoute the mynstre; is the chayere that he satt in, whan he translated it. And faste besyde that chirche, a 60 fedme, [Footnote: Fathom.] is a chirche of Seynt Nicholas, where oure Lady rested hire, aftre sche was lyghted of oure Lord. And for as meche as sche had to meche mylk in hire pappes, that greved hire, sche mylked hem on the rede stones of marble; so that the traces may zit be sene in the stones alle whyte. And zee schulle undrestonde, that alle that duellen in Betheleem ben Cristene men. And there ben fayre vynes about the cytee, and gret plentee of wyn, that the Cristene men han don let make. But the Sarazines ne tylen not no vynes, ne thei drynken no wyn. For here bokes of here lawe, that Makomete betoke hem, whiche thei clepen here Alkaron, and sume clepen it Mesaphe; and in another langage it is cleped Harme; and the same boke forbedethe hem to drinke wyn. For in that boke, Machomete cursed alle tho that drynken wyn, and alle hem that sellen it. For sum men seye, that he sloughe ones an heremyte in his dronkenesse, that he loved ful wel: and therefore he cursed wyn, and hem that drynken it. But his curs be turned in to his owne hed; as Holy Wrytt seythe; _Et in verticem ipsius iniquitas ejus descendet_; that is for to seye, _Hi wykkednesse schalle turne and falle in his owne heed_. And also the Sarazines bryngen forthe no pigges, nor thei eten no swynes flessche: for thei seye, it is brother to man, and it was forboden be the olde lawe: and thei holden hem alle accursed that eten there of. Also in the lond of Palestyne and in the lond of Egypt, thei eten but lytille or non of flessche of veel or of beef; but he be so old, that he may no more travayle for elde; for it is forbode: and for because the have but fewe of hem, therfore thei norisschen hem, for to ere here londes. In this cytee of Betheleem was David the kyng born: and he hadde 60 wyfes; and the firste wyf hihte Michol: and also he hadde 300 lemmannes.

An fro Betheleem unto Jerusalem nys but 2 myle. And in the weye to Jerusalem, half a myle fro Betheleem is a chirche, where the aungel seyde to the scheppardes, of the birthe of Crist. And in that weye is the tombe of Rachelle, that was Josephes modre, the patriarke; and sche dyede anon, aftre that sche was delyvered of hire sone Beniamyn; and there sche was buryed of Jacob hire husbonde: and he leet setten 12 grete stones on here, in tokene that sche had born 12 children. [Footnote: Rachel had only two children, but twelve grandchildren.] In the same weye, half myle fro Jerusalem, appered the sterre to the 3 kynges. In that weye also ben manye chirches of Cristen men, be the whiche men gon towardes the cytee of Jerusalem.

Of the Pilgrimages in Jerusalem and of the Holy Places thereaboute.

[Sidenote: Cap. VII.] After for to speke of Jerusalem, the holy cytee, zee schulle undirstonde, that it stont fulle faire betwene hilles: and there ben no ryveres ne welles; but watre comethe be condyte from Ebron. And zee schulle undirstonde, that Jerusalem of olde tyme, unto the tyme of Melchisedeche, was cleped Jebus; and aftre it was clept Salem, unto the tyme of Kyng David, that putte theise 2 names to gidere, and cleped it Jebusalem; and aftre that Kyng Salomon cleped it Jerosoloyme: and aftre that, men cleped it Jerusalem; and so it is cleped zit. And aboute Jerusalem is the kyngdom of Surrye: and there besyde is the lond of Palestyne: and besyde it is Ascolone: and besyde that is the lond of Maritaine. But Jerusalem is in the lond of Judee; and it is clept Jude, for that Judas Machabeus was kyng of that contree; and it marchethe estward to the kyngdom of Arabye; on the southe syde, to the lond of Egipt; and on the west syde, to the grete see; on the north syde, towarde the kyngdom of Surrye, and to the See of Cypre. In Jerusalem was wont to be a patriark, and erchebysshoppes and bisshoppes abouten in the contree. Abouten Jerusalem ben theise cytees: Ebron, at 7 myle; Jerico, at 6 myle; Bersabee, at 8 myle; Ascalon, at 17 myle; Jaff, at 16 myle; Ramatha, at 3 myle; and Betheleem, at 2 myle. And a 2 myle trom Betheleem, toward the sowthe, is the chirche of Seynt Karitot, that was abbot there; for whom thei maden meche Doel [Footnote: Mourning.] amonges the monkes, whan he scholde dye; and zit thei ben in moornynge, in the wise that thei maden here lamentacioun for him the firste tyme: and it is fulle gret pytee to beholde.

This contree and lond of Jerusalem hathe ben in many dyverse naciounes hondes: and often therfore hathe the contree suffred meche tribulacioun, for the synne of the people, that duellen there. For that contree hathe ben in the hondes of alle nacyouns: that is to seyne, of Jewes, of Chananees, Assiryenes, Perses, Medoynes, Macedoynes, of Grekes, Romaynes, of Cristene men, of Sarazines, Barbaryenes, Turkes, Tartaryenes, and of manye othere dyverse nacyouns. For God wole not, that it be longe in the hondes of trytoures ne of synneres, be thei Cristene or othere. And now have the hethene men holden that lond in here hondes 40 zeere and more: but thei schulle not holde it longe, zif God wole.

And zee schulle undirstond, that whan men comen to Jerusalem, here first pilgrymage is to the Chirche of the Holy Sepulcre, where oure Lord was buryed, that is with oute the cytee, on the northe syde: but it is now enclosed in, with the toun walle. And there is a fulle fayr chirche, alle rownd, and open above, and covered with leed. And on the west syde is a fair tour and an highe, for belles, strongly made. And in the myddes of the chirche is a tabernacle, as it were a lytylle hows, made with a low lytylle dore: and that tabernacle is made in manere of half a compass, righte curiousely and richely made, of gold and azure and othere riche coloures, fulle nobelyche made. And in the righte syde of that tabernacle is the sepulcre of oure Lord. And the tabernacle is 8 fote longe, and 5 fote wyde, and 11 fote in heighte. And it is not longe sithen the sepulcre was alle open, that men myghte kisse it and touche it. But for pilgrymes that comen thidre, peyned hem to breke the ston in peces or in poudre, therfore the Soudan hathe do make a walle aboute the sepulcre, that no man may towche it. But in the left syde of the walle of the tabernacle is well the heighte of a man, a gret ston to the quantytee of a mannes hed, that was of the holy sepulcre: and that ston kissen the pilgrymes, that comen thidre. In that tabernacle ben no wyndowes: but it is alle made lighte with lampes, that hangen before the sepulcre. And there is a lampe, that hongethe before the sepulcre, that brennethe lighte: and on the Gode Fryday it gothe out be him self; and lyghtith azen be him self at that oure, that oure Lorde roos fro dethe to lyve. Also within the chirche, at the righte syde, besyde the queer of the chirche, is the Mount of Calvarye, where oure Lord was don on the Cros: and it is a roche of white colour, and a lytille medled with red: and the Cros was set in a morteys, in the same roche: and on that roche dropped the woundes of our Lord, whan he was payned on the Crosse; and that is cleped Golgatha. And men gon up to that Golgotha be degrees: and in the place of that morteys was Adames hed founden, aftre Noes flode; in tokene that the synnes of Adam scholde ben boughte in that same place. And upon that roche made Abraham sacrifice to oure Lord. And there is an awtere: and before that awtere lyzn Godefray de Boleyne and Bawdewyn, and othere Cristene kynges of Jerusalem; And there nyghe, where our Lord was crucyfied, is this written in Greek, [Greek: Ho Theos Basileus haemon pro aionon eirgasato aotaerian en meso taes gaes.] that is to seyne, in Latyn, _Deus Rex noster ante secula operatus est salutem, in medio terrae_; that is to seye, _Gode oure Kyng, before the worldes, hathe wroughte hele in myddis of the erthe_. And also on that roche, where the Cros was sett, is writen with in the roche theise, wordes; [Greek: Ho eideis esti basis taes pisteos holaes tou kosmou touton.] that is to seyne in Latyn, _Quod vides, est fundamentum totius Fidei hujus Mundi_; that is to seyne, _That thou seest, is ground of alle the feythe of this world_. And zee schulle undirstonde, that whan oure Lord was don upon the Cros, he was 33 zere and 3 moneths of elde. And the prophecye of David seythe thus: _Quadraginta annis proximus fui generationi huic_; that is to seye, _fourty zeer was I neighebore to this kynrede_. And thus scholde it seme, that the prophecyes ne were not trewe: but thei ben bothe trewe: for in old tyme men maden a zeer of 10 moneths; of the whiche Marche was the firste, and Decembre was the laste. But Gayus, that was Emperour of Rome, putten theise 2 monethes there to, Janyver and Feverer; and ordeyned the zeer of 12 monethes; that is to seye, 365 dayes, with oute lepe zeer, aftre the propre cours of the sonne. And therfore, aftre cowntynge of 10 monethes of the zeer, de dyede in the 40 zeer; as the prophete seyde; and aftre the zeer of 12 monethes, he was of age 33 zeer and 3 monethes. Also with in the Mount Calvarie, on the right side, is an awtere, where the piler lyzthe, that oure Lord Jesu was bounden to, whan he was scourged. And there besyde ben 4 pileres of ston, that alle weys droppen watre: and sum men seyn, that thei wepen for our Lordes dethe. And nyghe that awtier is a place undre erthe, 42 degrees of depnesse, where the holy croys was founden, be the wytt of Seynte Elyne, undir a roche, where the Jewes had hidde it. And that was the verray croys assayed: for thei founden 3 crosses; on of oure Lord, and 2 of the 2 theves: and Seynte Elyne preved hem on a ded body, that aros from dethe to lyve, whan it was leyed on it that oure Lord dyed on. And there by in the walle is the place where the 4 nayles of oure Lord weren hidd: for he had 2 in his hondes, and 2 in his feet: and of on of theise, the Emperour of Costantynoble made a brydille to his hors, to bere him in bataylle: and thorghe vertue there of, he overcam his enemyes, and wan alle the lond of Asye the lesse; that is to seye, Turkye, Ermonye the lasse and the more; and from Surrye to Jerusalem, from Arabye to Persie, from Mesopotayme to the kyngdom of Halappee, from Egypt the highe and the lowe, and all the othere kyngdomes, unto the Depe of Ethiope, and into Ynde the lesse, that then was Cristene. And there were in that tyme many gode holy men and holy heremytes; of whom the book of fadres lyfes spekethe: and thei ben now in Paynemes and Sarazines honds. But whan God alle myghty wole, righte als the londes weren lost thorghe synne of Cristene men, so schulle thei ben wonnen azen be Cristen men thorghe help of God. And in myddes of that chirche is a compas, in the whiche Joseph of Aramathie leyde the body of oure Lord, whan he had taken him down of the cross: and there he wassched the woundes of oure Lord: and that compas, seye men, is the myddes of the world. And in the Chirche of the Sepulchre, on the north syde, is the place where oure Lord was put in presoun; (for he was in presoun in many places) and there is a partye of the Cheyne that he was bounden with: and there he appered first to Marie Magdaleyne, whan he was rysen; and sche wende, that he had ben a gardener. In the chirche of Seynt Sepulchre was wont to ben chanouns of the ordre of Seynt Augustyn, and hadden a priour; but the patriark was here sovereygne. And withe oute the dores of the chirche, on the right syde, as men gon upward 18 Greces, seyde oure Lord to his moder, _Mulier, ecce filius tuus_; that is to seye, _Woman, lo thi Sone_. And aftre that, he seyde to John his disciple, _Ecce mater tua_; that is to seyne, _Lo, behold thi modir_: And these wordes he seyde on the cros. And on theise Greces wente oure Lord, whan he bare the crosse on his schuldir. And undir this grees is a chapelle; and in that chapelle syngen prestes, yndyenes; that is to seye, prestes of ynde; noght aftir oure lawe, but aftir here: and alle wey thei maken here sacrement of the awtier, seyenge, _Pater noster_, and othere preyeres there with: with the which preyeres, thei seye the wordes, that the sacrement is made of. For thei ne knowe not the addiciouns, that many Popes han made; but thei synge with gode devocioun. And there nere, is the place where that oure Lord rested him, whan he was wery, for berynge of the Cros. And zee schulle undirstonde, that before the Chirche of the Sepulcre, is the cytee more feble than in ony othere partie, for the grete playn that is betwene the chirche and the cytee. And toward the est syde, with oute the walles of the cytee, is the Vale of Josaphathe, that touchethe to the walles, as thoughe it were a large dyche. And anen that Vale of Josaphathe, out of the cytee, is the Chirche of Seynt Stevene, where he was stoned to dethe. And there beside, is the gildene zate, that may not ben opened; be the whiche zate, oure Lord entrede on Palmesonday, upon an asse; and the zate opened azenst him, whan he wolde go unto the temple: and zit apperen the steppes of the asses feet, in 3 places of the degrees, that ben of fulle harde ston. And before the chirche of Seynt Sepulcre, toward the southe, a 200 paas, is the gret hospitalle of Seynt John; of the whiche the hospitleres hadde here foundacioun. And with inne the palays of the seke men of that hospitalle ben 124 pileres of ston: and in the walles of the hows, with oute the nombre aboveseyd, there ben 54 pileres, that beren up the hows. And fro that hospitalle, to go toward the est, is a fulle fayr chirche, that is clept _Nostre Dame la Graund_. And than is there another chirche right nyghe, that is clept _Nostre Dame la Latytne_. And there weren Marie Cleophee and Marie Magdaleyne, and teren here heer, whan oure Lord was peyned in the cros.

Of the Temple of oure Lord. Of the Crueltee of Kyng Heroud. Of the Mount
Syon. Of Probatica Piscina. And of Natatorium Siloe.

[Sidenote: Cap. VIII.] And fro the chirche of the sepulcre, toward the est, at 160 paas, is _Templum Domini_. It is right a feir hows, and it is alle round, and highe, and covered with leed, and it is well paved with white marble: but the Sarazine wole not suffre no Cristene manne Jewes to come there in; for thei seyn, that none so foule synfulle men scholde not come in so holy place: but I cam in there, and in othere places, where I wolde; for I hadde lettres of the Soudan, with his grete seel; and comounly other men han but his signett. In the whiche lettres he comanded of his, specyalle grace, to all his subgettes, to lete me seen alle the places, and to enforme me pleynly alle the mysteries of every place, and to condyte me fro cytee to cytee, zif it were nede, and buxomly to resceyve me and my companye, and for to obeye to alle my requestes resonable, zif thei weren not gretly azen the royalle power, and dignytee of the Soudan or of his lawe. And to othere, that asken him grace, suche as han served him, he ne zevethe not but his signet; the whiche thei make to be born before hem, hangynge on a spere; and the folk of the contree don gret worschipe and reverence to his signett or his seel, and knelen there to, as lowly as wee don to _Corpus Domini_. And zit men don fulle grettere reverence to his lettres. For the admyralle and alle othere lordes, that thei ben schewed to, before or thei resceyve hem, thei knelen doun, and than thei take hem, and putten hem on here hedes, and aftre thei kissen hem, and than thei reden hem, knelynge with gret reverence, and than thei offren hem to do alle, that the berere askethe. And in this _Templum Domini_ weren somtyme chanouns reguleres: and thei hadden an abbot, to whom thei weren obedient. And in this temple was Charlemayn, when that the aungelle broughte him the prepuce of oure Lord Jesu Crist, of his circumcisioun: and aftre Kyng Charles leet bryngen it to Parys, in to his chapelle: and aftre that to Chartres. And zee schulle undirstonde, that this is not the temple that Salomon made: for that temple dured not, bat 1102 zeer. For Tytus, Vespasianes sone, Emperour of Rome, had leyd sege aboute Jerusalem, for to discomfyte the Jewes: for thei putten oure Lord to dethe, with outen leve of the Emperour. And whan he hadde wonnen the cytee, he brente the temple and beet it down, and alle the cytee, and toke the Jewes, and dide hem to Dethe, 1100000: and the othere he putte in presoun, and solde hem to servage, 30 for o peny: for thei seyde, thei boughte Jesu for 30 penyes: and he made of hem bettre cheep, whan he zaf 30 for o peny. And aftre that tyme, Julianas Apostate, that was Emperour, zaf leve to the Jewes to make the Temple of Jerusalem: for he hated Cristene men; and zit he was cristned, but he forsoke his law, and becam a renegate. And whan the Jewes hadden made the temple, com an erthe quakeng, and cast it doun (as God wolde) and destroyed alle that thei had made. And aftre that, Adryan, that was Emperour of Rome, and of the lynage of Troye, made Jerusalem azen, and the temple, in the same manere, as Salomon made it. And he wolde not suffre no Jewes to dwelle there, but only Cristene men. For alle thoughe is were so, that hee was not cristned, zet he lovede Cristene men, more than ony other nacioun, saf his owne. This Emperour leet enclose the Chirche of Seynt Sepulcre, and walle it, within the cytee, that before was with oute the cytee, long tyme beforn. And he wolde have chaunged the name of Jerusalem, and have cleped it Elya: but that name lasted not longe. Also zee schulle undirstonde, that the Sarazines don moche reverence to that temple; and thei seyn, that that place is right holy. And whan thei gon in, thei gon barefote, and knelen many tymes. And whanne my felowes and I seyghe that, whan we comen in, wee diden of oure shoon, and camen in barefote, and thoughten that we scholden don as moche worschipe and reverence there to, as ony of the mysbeleevynge men sholde, and as gret compunction in herte to have. This temple is 64 cubytes of wydenesse, and als manye in lengthe; and of heighte it is 120 cubites: and it is with inne, alle aboute, made with pyleres of marble: and in the myddel place of the temple ben manye highe stages, of 14 degrees of heighte, made with gode pyleres alle aboute: and this place the Jewes callen _Sancta Sanctorum_; that is to seye, _holy of halewes_. And in that place comethe no man, saf only here prelate, that makethe here sacrifice. And the folk stonden alle aboute, in diverse stages, aftre thei ben of dignytee or of worschipe; so that thei alle may see the sacrifice. And in that temple ben 4 entrees; and the zates ben of cypresse, wel made and curiousely dight. And with in the est zate, oure Lorde seyde, _Here is Jerusalem._ And in the northsyde of that temple with in the zate, there is a welle; but it rennethe noght; of the whiche Holy Writt spekethe, and seythe, _Vidi aquam egredientem de Templo_; that is to seyne, _I saughe watre come out of the Temple_. And on that other syde of the Temple there is a roche, that men clepen Moriache: but aftre it was clept Bethel; where the arke of God, with relykes of Jewes, weren wont to ben put. That arke or hucche, with the relikes, Tytus ledde with hym to Rome, whan he had scomfyted alle the Jewes. In that arke weren the 10 commandementes, and of Arones zerde, and of Moyses zerde, with the whiche he made the Rede See departen, as it had ben a walle, on the righte syde and on the left syde, whils that the peple of Israel passeden the see drye foot: and with that zerde he smoot the roche; and the watre cam out of it: and with that zerde he dide manye wondres. And there in was a vessel of gold, fulle of manna, and clothinges and ournements and the tabernacle of Aaron, and a tabernacle square of gold, with 12 precyous stones, and a boyst of jasper grene, with 4 figures, and 8 names of oure Lord, and 7 candelstykes of gold, and 12 pottes of gold, and 4 censeres of gold, and an awtier of gold, and 4 lyouns of gold, upon the whiche thei bare cherubyn of gold, l2 spannes long, and the cercle of swannes of Hevene, with a tabernacle of gold, and a table of sylver, and 2 trompes of silver, and 7 barly loves, and alle the othere relikes, that weren before the birthe of oure Lord Jesu Crist. And upon that roche, was Jacob slepynge, when he saughe the aungeles gon up and doun, by a laddre, and he seyd, _Vere locus isse sanctus est, et ego ignorabam_; that is to seyne, _Forsothe this place is holy, and I wiste it nought_. And there an aungel helde Jacob stille, and turned his name, and cleped him Israel. And in that same place, David saughe the aungelle, that smot the folk with a swerd, and put it up blody in the schethe. And in that same roche, was Seynt Symeon, whan he resceyved oure Lord into the Temple. And in this roche he sette him, whan the Jewes wolde a stoned him; and a sterre cam doun, and zaf him light. And upon that roche, prechede our Lord often tyme to the peple; and out of that seyd temple, oure Lord drof the byggeres and the selleres. And upon that roche, oure Lord sette him, whan the Jewes wolde have stoned him; and the roche cleef in two, and in that clevynge was oure Lord hidd; and there cam doun a sterre, and zaf lighte and served him with claretee; and upon that roche, satt oure lady, and lerned hire sawtere; and there our Lord forzaf the womman hire sinnes, that was founden in Avowtrie: and there was oure Lord circumcyded: and there the aungelle schewede tydynges to Zacharie of the birthe of Seynt Baptyst his sone; and there offred first Melchisedeche bred and wyn to oure Lord, in tokene of the sacrement that was to comene; and there felle David preyeng to oure Lord, and to the aungelle, that smot the peple, that he wolde have mercy on him and on the peple; and oure Lorde herde his preyere; and therefore wolde he make the temple in that place: but oure Lord forbade him, be an aungelle, for he had don tresoun, whan he leet sle Urie the worthi knyght, for to have Bersabee his wyf; and therfore all the purveyance, that he hadde ordeyned to make the temple with, he toke it Salomon his sone; and he made it. And he preyed oure Lord, that alle tho that preyeden to him, in that place, with gode herte, that he wolde heren here preyere and graunten it hem, zif thei asked it rightefullyche: and oure Lord graunted it him: and therfore Salomon cleped that temple, the Temple of Conseille and of Help of God. And with oute the zate of that temple is an awtiere, where Jewes werein wont to offren dowves and turtles. And betwene the temple and that awtiere was Zacharie slayn. And upon the pynacle of that temple was oure Lord brought, for to ben tempted of the enemye, the feend. And on the heighte of that pynacle, the Jewes setten Seynt Jame, and casted him down to the erthe, that first was Bisschopp of Jerusalem. And at the entree of that temple, toward the west, is the zate that is clept _Porta speciosa_. And nyghe besyde that temple, upon the right syde, is a chirche covered with leed, that is clept Salomones Scole. And fro that temple, towardes the southe, right nyghe, is the Temple of Salomon, that is righte fair and wel pollisscht. And in that temple duellen the knyghtes of the temple, that weren wont to be clept templeres: and that was the foundacionn of here ordre; so that there duelleden knyghtes; and in _Templo Domini_, chanouns reguleres. Fro that temple toward the est, a 120 paas, in the cornere of the cytee, is the bathe of oure Lord: and in that bathe was wont to come watre fro paradys, and zit it droppethe. And there besyde, is oure ladyes bed. And faste by, is the temple of Seynt Symeon: and with oute the cloyster of the temple, toward the northe, is a fulle faire chirche of Seynte Anne, oure ladyes modre: and there was oure lady conceyved. And before that chirche, is a gret tree, that began to growe the same nyght. And undre that chirche, in goenge doun be 22 degrees, lythe Joachym, oure ladyes fader, in a faire tombe of ston: and there besyde, lay somtyme Seynt Anne his wyf; but Seynt Helyne leet translate hire to Costantynople. And in that chirche is a welle, in manere of a cisterne, that is clept _Probatica Piscina_, that hathe 5 entrees. Into that welle, aungeles weren wont to come from Hevene, and bathen hem with inne: and, what man that first bathed him, aftre the mevynge of the watre, was made hool, of what maner sykenes that he hadde: and there oure Lord heled a man of the palasye, that laye 38 zeer: and oure Lord seyde to him, _Tolle Grabatum tuum & ambula_: that is to seye, _Take thi bed, and go_. And there besyde, was Pylates hows. And faste by, is Kyng Heroudes hows, that leet sle the innocentes. This Heroude was over moche cursed and cruelle: for first he leet sle his wif, that he lovede righte welle; and for the passynge love, that he hadde to hire, whan he saughe hire ded, he felle in a rage, and oute of his wytt, a gret while; and sithen he cam azen to his wytt: and aftre he leet sle his two sones, that he hadde of that wyf: and aftre that, he leet sle another of his wyfes, and a sone, that he hadde with hire: and aftre that, he leet sle his owne modre: and he wolde have slayn his brother also, but he dyede sodeynly. And aftre he fell into seknesse, and whan he felte, that he scholde dye, he sente aftre his sustre, and aftre alle the lordes of his lond; and whan thei were comen; he leet commande hem to prisoun, and than he seyde to his sustre, he wiste wel, that men of the contree wolde make no sorwe for his dethe; and therefore be made his sustre swere, that sche scholde lete smyte of alle the heds of the lordes, whan he were ded; and than scholde alle the lond make sorwe for his dethe, and else nought: and thus he made his testement. But his sustre fulfilled not his wille: for als sone as he was ded, sche delyvered alle the lordes out of presoun, and lete hem gon, eche lord to his owne; and tolde hem alle the purpos of hire brothers ordynance: and so was this cursed kyng never made sorwe for, as he supposed for to have ben. And zee schulle undirstonde, that in that tyme there weren 3 Heroudes, of gret name and loos for here crueltee. This Heroude, of whiche I have spoken offe, was Heroude Ascalonite: and he that leet beheden seynt John the Baptist, was Heroude Antypa: and he that leet smyte of Seynt James hed, was Heroude Agrippa; and he putte Seynt Peter in presoun.

Also furthermore, in the cytee, is the Chirche of Seynt Savyour; and there is the left arm of John Crisostom, and the more partye of the hed of Seynt Stevene. And on that other syde of the strete, toward the southe, as men gon to Mount Syon, is a chirche of Seynt James, where he was beheded. And fro that chirche, a 120 paas, is the Mount Syon: and there is a faire chirche of oure Lady, where sche dwelled; and there sche dyed. And there was wont to ben an abbot of Chanouns Reguleres. And fro thens, was sche born of the apostles, onto the Vale of Josaphathe. And there is the ston, that the aungelle broughte to oure Lady, fro the Mount of Synay; and it is of that colour, that the roche is of Seynt Kateryne. And there besyde, is the zate, where thorghe oure Ladye wente, whan sche was with childe, whan sche wente to Betheleem. Also at the entree of the Mount Syon, is a chapelle; and in that chapelle is the ston gret and large, with the whiche the sepulcre was covered with, whan Josephe of Aramathie had put oure Lord thereinne: the whiche ston the 3 Maries sawen turnen upward, whan thei comen to the sepulcre, the day of his resurrexioun; and there founden an aungelle, that tolde hem of oure Lordes uprysynge from dethe to lyve. And there also is a ston, in a walle, besyde the zate, of the pyleer, that oure Lord was scourged ate: and there was Annes hows, that was Bishop of the Jewes, in that ryme. And there was oure Lord examyned in the nyght, and scourged and smytten and vylently entreted. And in that same place, Seynt Peter forsoke oure Lord thries, or the cok creew. And there is a party of the table, that he made his souper onne, whan be made his maundee, with his discyples; whan he zaf hem his flesche and his blode, in forme of bred and wyn. And undre that chapelle, 32 degrees, is the place, where oure Lord wossche his disciples feet and zit is the vesselle, where the watre was. And there besyde that same vesselle, was Seynt Stevene buryed. And there is the awtier, where oure Lady herde the aungelles synge messe. And there appered first oure Lord to his disciples, after his resurrexioun, the zates enclosed, and seyde to hem, _Pax vobis_: that is to seye, _Pees to zou_. And on that mount, appered Crist to Seynt Thomas the apostle, and bade him assaye his woundes; and there beleeved he first, and seyde, _Dominus meus et Deus meus_; that is to seye, _my Lord and my God_. In the same chirche, besyde the awteer, weren alle the aposteles on Whytsonday, whan the Holy Gost descended on hem, in lyknesse of fuyr. And there made oure Lord his pask, [Footnote: Pascal feast] with his disciples. And there slept Seynt John the Evaungeliste, upon the breeste of oure Lord Jesu Crist, and saughe slepynge many hevenly prevytees.

Mount Syon is with inne the cytee; and it is a lytille hiere than the other syde of the cytee: and the cytee is strongere on that syde, than on that other syde. For at the foot of the Mount Syon, is a faire castelle and a strong, that the Soudan leet make. In the Mount Syon weren buryed Kyng David and Kyng Salomon, and many othere kynges, Jewes of Jerusalem. And there is the place, where the Jewes wolden han cast up the body of oure Lady, whan the apostles beren the body to ben buryed, in the Vale of Josaphathe. And there is the place, where Seynt Petir wepte fulle tenderly, aftre that he hadde forsaken oure Lord. And a stones cast fro that chapelle, is another chapelle, where oure Lord was jugged: for that tyme, was there Cayphases hows. From that chapelle, to go toward the est, at 140 paas, is a deep cave undre the roche, that is clept the Galylee of oure Lord; where Seynt Petre hidde him, whanne he had forsaken oure Lord. Item, betwene the Mount Syon and the Temple of Salomon, is the place, where oure Lord reysed the mayden, in hire fadres hows. Undre the Mount Syon, toward the Vale of Josaphathe, is a welle, that is clept _Natatorium Siloe_; and there was oure Lord wasshen, aftre his bapteme: and there made oure Lord the blynd man to see. And there was y buryed Ysaye the prophete. Also streghte from Natatorie Siloe, is an ymage of ston, and of olde auncyen werk, that Absalon leet make: and because there of, men clepen it the head of Absalon. And faste by, is zit the tree of eldre, that Judas henge him self upon, for despeyr that he hadde, whan he solde and betrayed oure Lord. And there besyde, was the synagoge, where the bysshoppes of Jewes and the pharyses camen to gidere, and helden here conseille. And there caste Judas the 30 pens before hem, and seyde, that he hadde synned, betrayenge oure Lord. And there nyghe was the hows of the apostles Philippe and Jacob Alphei. And on that other syde of Mount Syon, toward the southe, bezonde the Vale, a stones cast, is Acheldamache; that is to seye, the Feld of Blood; that was bought for the 30 pens, that oure Lord was sold fore. And in that feld ben many tombes of Cristene men: for there ben manye pilgrymes graven. And there ben many oratories, chapelles and heremytages, where heremytes weren wont to duelle. And toward the est, an 100 pas, is the charnelle of the hospitalle of seynt John, where men weren wont to putte the bones of dede men.

Also fro Jerusalem, toward the west, is a fair chirche, where the tree of the cros grew. And 2 myle fro thens, is a faire chirche; where oure lady mette with Elizabethe, whan thei weren bothe with childe; and seynt John stered in his modres wombe, and made reverence to his Creatour, that he saughe not. And undre the awtier of that chirche, is the place where seynt John was born. And fro that chirche, is a myle to the castelle of Emaux; and there also oure Lord schewed him to 2 of his disciples, aftre His resurrexion. Also on that other syde, 200 pas fro Jerusalem, is a chirche, where was wont to be the cave of the lioun: and undre that chirche, at 30 degrees of depnesse, weren entered 12000 martires, in the tyme of Kyng Cosdroc, that the lyoun mette with alle in a nyghte, be the wille of God. Also fro Jerusalem 2 myle, is the Mount Joye, a fulle fair place and a delicyous: and there lythe Samuel the prophete in a faire tombe: and men clepen it Mount Joye; for it zevethe joye to pilgrymes hertes, be cause that there men seen first Jerusalem. Also betwene Jerusalem and the Mount of Olyvete, is the Vale of Josaphathe, undre the walles of the cytee, as I have seyd before: and in the myddes of the vale, is a lytille ryvere, that men clepen Torrens Cedron; and aboven it, over thwart, lay a tre, (that the cros was made offe) that men zeden over onne: and faste by it is a litylle pytt in the erthe, where the foot of the pileer is zit entered; and there was oure Lord first scourged: for he was scourged and vileynsly entreted in many places. Also in the myddel place of the vale of Josaphathe, is the chirche of oure lady: and it is of 43 degrees, undre the erthe, unto the sepulchre oure lady. And oure lady was of age, when sche dyed, 72 zeer. And beside the sepulchre of oure lady, is an awtier, where oure Lord forzaf seynt Petir all his synnes. And fro thens, toward the west, undre an awtere, is a welle, that comethe out of the ryvere of Paradys. And witethe wel, that that chirche is fulle lowe in the erthe; and sum is alle with inne the erthe. But I suppose wel, that it was not so founded: but for because that Jerusalem hathe often tyme ben destroyed, and the walles abated and beten doun and tombled in to the vale, and that thei han ben so filled azen, and the ground enhaunced; and for that skylle, is the chirche so lowe with in the erthe: and natheles men seyn there comounly, that the erthe hathe so ben cloven, sythe the tyme, that oure Lady was there buryed: and zit men seyn there, that it wexethe and growethe every day, with outen dowte. In that chirche were wont to ben blake monkes, that hadden hire abbot. And besyde that chirche, is a chapelle, besyde the roche, that highte Gethesamany: and there was oure Lord kyssed of Judas; and there was he taken of the Jewes; and there laft oure Lord his disciples, whan he wente to preye before his passioun, whan he preyed and seyde, _Pater, si fieri potest, transeat a me calix iste_; that is to seye, _Fadre, zif it may be, do lete this chalys go fro me_. And whan he cam azen to his disciples, he fond hem slepynge. And in the roche, with inne the chapelle, zit apperen the fyngres of oure Lordes hond, whan he putte hem in the roche, whan the Jewes wolden have taken him. And fro thens a stones cast, toward the southe, is anothere chapelle, where oure Lord swette droppes of blood. And there righte nyghe, is the tombe of Kyng Josaphathe; of whom the vale berethe the name. This Josaphathe was kyng of that contree, and was converted by an heremyte, that was a worthi man, and dide moche gode. And fro thens a bowe drawghte, towards the south, is the chirche, where Seynt James and Zacharie the prophete weren buryed. And above the vale, is the Mount of Olyvete: and it is cleped so, for the plentee of olyves, that growen there. That mount is more highe than the cytee of Jerusalem is: and therfore may men, upon that mount, see manye of the stretes of the cytee. And between that mount and the cytee, is not but the vale of Josaphathe, that is not fulle large. And fro that mount, steighe oure Lord Jesu Crist to Hevene, upon ascencioun day: and zit there schewethe the schapp of his left foot, in the ston. And there is a chirche, where was wont to be an abbot and chanouns reguleres. And a lytylle thens, 28 pas, is a chapelle, and there in is the ston, on the whiche oure Lord sat, whan he prechede the 8 blessynges, and seyde thus: _Beati pauperes spiritu_: and there he taughte his disciples the _Pater noster_; and wrote with his finger in a ston. And there nyghe is a chirche of Seynte Marie Egipcyane; and there sche lythe in a tombe. And fro then toward the est, a 3 bow schote, is Bethfagee; to the whiche oure Lord sente Seynt Peter and Seynt James, for to feche the asse, upon Palme Sonday, and rode upon that asse to Jerusalem. And in comynge doun fro the Mount of Olyvete, toward the est, is a castelle, that is cleped Bethanye: and there dwelte Symon leprous, and there herberwed oure Lord; and aftre, he was baptized of the Apostles, and was clept Julian, and was made bisschoppe: and this is the same Julyan, that men clepe to for gede herberghgage; for oure Lord herberwed with him, in his hows. And in that hous, oure Lord forzaf Marie Magdaleyne hire synnes; there sche whassched his feet with hire teres, and wyped hem with hire heer. And there served seynt Martha, oure Lord. There oure Lord reysed Lazar fro dethe to lyve, that was ded 4 dayes and stank, that was brother to Marie Magdaleyne and to Martha. And there duelte also Marie Cleophe. That castelle is wel a myle long fro Jerusalem. Also in comynge doun fro the Mount of Olyvete, is the place where oure Lord wepte upon Jerusalem. And there besyde is the place, where oure lady appered to seynt Thomas the Apostle, aftre hire assumptioun, and zaf him hire Gyrdylle. And right nyghe is the ston, where oure Lord often tyme sat upon, whan he prechede: and upon that same schalle he sytte, at the day of doom; righte as him self seyde.

Also aftre the Mount of Olyvete, is the Mount of Galilee: there assembleden the apostles, whan Marie Magdaleyne cam, and tolde hem of Cristes uprisynge. And there, betwene the Mount Olyvete and the Mount Galilee, is a chirche, where the aungel seyde to our lady, of hire dethe. Also fro Bethanye to Jerico, was somtyme a litylle Cytee: but it is now alle destroyed; and now is there but a litylle village. That cytee tok Josue, be myracle of God and commandement of the aungel, and destroyed it and cursed it, and alle hem that bylled it azen. Of that citee was Zacheus the dwerf, that clomb up in to the Sycomour Tre, for to see oure Lord; be cause he was so litille, he myghte not seen Him for the peple. And of that cytee was Raab the comoun womman, that ascaped allone, with hem of hire lynage; and sche often tyme refressched and fed the messageres of Israel, and kepte hem from many grete periles of dethe: and therfore sche hadde gode reward; as Holy Writt seythe: _Qui accipit prophetam in nomine meo, mercedem prophetae accipiet_; that is to seye, _He that takethe a prophete in my name, he schalle take mede of the prophete_: and so had sche; for sche prophecyed to the messageres, seyenge, _Novi quod Dominus tradet vobis Terram hanc_; that is to seye, _I wot wel, that oure Lord schal betake zou this Lond_: and so he dide. And after Salomon, Naasones sone, wedded hire; and fro that tyme was sche a worthi womman, and served God wel. Also from Betanye gon men to flom [Footnote: River,--Latin, _flumen_.] Jordan, by a mountayne, and thorghe desert; and it is nyghe a day jorneye fro Bethanye, toward the est, to a gret hille, where oure Lord fasted 40 dayes. Upon that hille, the enemy of helle bare our Lord, and tempted him, and seyde; _Dic ut lapides isti panes fiant_; that is to seye, _Sey, that theise stones be made loves_. In that place, upon the hille, was wont to ben a faire chirche; but it is alle destroyed, so that there is now but an hermytage, that a maner of Cristene men holden, that ben cleped Georgyenes: for Seynt George converted hem. Upon that hille duelte Abraham a gret while: and therfore men clepen it, Abrahames gardyn. And betwene the hille and this gardyn rennethe a lytille broke of watre, that was wont to ben byttre; but be the blessyng of Helisee the prophete, it becam swete and gode to drynke. And at the foot of this hille, toward the playn, is a grete welle, that entrethe in to flom Jordan. Fro that hille to Jerico, that I spak of before, is but a myle, in goynge toward flom Jordan. Also as men gon to Jerico, sat the blynde man, cryenge, _Jesu, fili David, miserere mei_; that is to seye, _Jesu, Davides sone, have mercy on me_: and anon he hadde his sighte. Also 2 myle fro Jerico is flom Jordan: and an half myle more nyghe, is a faire chirche of Seynt John the Baptist; where he baptised oure Lord: and there besyde, is the hous of Jeremye the prophete.

Of the dede See; and of the Flom Jordan. Of the Hed of Seynt John the
Baptist; and of the Usages of the Samaritanes.

[Sidenote: Cap. IX.] And fro Jerico, a 3 myle, is the dede See. Aboute that See growethe moche alom and of alkatram. [Footnote: Brimstone.] Betwene Jerico and that see is the lond of Dengadde; and there was wont to growe the bawme; but men make drawe the braunches there of, and beren hem to ben graffed at Babiloyne; and zit men clepen hem vynes of Gaddy. At a cost of that see, as men gon from Arabe, is the mount of the Moabytes; where there is a cave, that men clepen Karua. Upon that hille, ladde Balak the sone of Booz, Balaam the prest, for to curse the peple of Israel. That dede See departethe the lond of Ynde and of Arabye; and that see lastethe from Soara unto Arabye. The watre of that see is fulle bytter and salt: and ziff the erthe were made moyst and weet with that watre, it wolde nevere bere fruyt. And the erthe and the lond chaungeth often his colour. And it castethe out of the watre a thing that men clepen aspalt; also gret peces, as the gretnesse of an hors, every day, and on alle sydes. And fro Jerusalem to that see, is 200 furlonges. That see is in lengthe 580 furlonges, and in brede 150 furlonges: and it is clept the dede see, for it rennethe nought. but is evere unmevable. And nouther manne, best, ne no thing that berethe lif in him, ne may not dyen in that see: and that hathe ben proved manye tymes, be men that han disserved to ben dede, that han ben cast there inne, and left there inne 3 dayes or 4, and thei ne myghte never dye ther inne: for it resceyvethe no thing with inne him, that berethe lif. And no man may drynken of the watre, for bytternesse. And zif a man caste iren there in, it wole flete aboven. And zif men caste a fedre there in, it wole synke to the botme: and theise ben thinges azenst kynde. And also the cytees there weren lost, be cause of synne. And there besyden growen trees, that beren fulle faire apples, and faire of colour to beholde; but whoso brekethe hem or cuttethe hem in two, he schalle fynde with in hem coles and cyndres; in tokene that, be wratthe of God, the cytees and the lond weren brente and sonken into helle. Sum men clepen that see, Lake Dalfetidee; summe, the Flom of Develes; and summe, the flom that is ever stynkynge. And in to that see sonken the 5 cytees, be wratthe of God; that is to seyne, Sodom, Gomorre, Aldama, Seboym and Segor, for the abhomynable synne of sodomye, that regned in hem. But Segor, be the preyer of Lothe, was saved and kept a gret while: for it was sett upon an hille; and zit schewethe therof sum party, above the watre: and men may see the walles, when it is fayr wedre and cleer. In that cytee Lothe dwelte, a lytylle while; and there was he made dronken of his doughtres, and lay with hem, and engendred of hem Moab and Amon. And the cause whi his doughtres made him dronken, and for to ly by him, was this; because thei sawghe no man aboute hem, but only here fadre: and therfore thei trowed, that God had destroyed alle the world, as he hadde don the cytees; as he hadde don before, be Noes flood. And therfore thei wolde lye with here fadre, for to have issue, and for to replenysschen the world azen with peple, to restore the world azen be hem: for thei trowed, that ther had ben no mo men in alle the world. And zif here fadre had not ben dronken, he hadde not y leye with hem. And the hille aboven Segor, men cleped it thanne Edom: and aftre men cleped it Seyr, and aftre Ydumea. Also at the righte syde of that dede See, dwellethe zit the wife of Lothe, in lyknesse of a salt ston; fur that schee loked behinde hire, whan the cytees sonken into helle. This Lothe was Araammes sone, that was brother to Abraham. And Sarra Abrahames wife, and Melcha Nachors wif, weren sustren to the seyd Lothe. And the same Sarra was of elde 90 zeer, when Ysaac hire sone was goten on hire. And Abraham hadde another sone Ysmael, that he gat upon Agar his chambrere. And when Ysaac his sone was 8 dayes olde, Abraham his fadre leet him ben circumcyded, and Ysmael with him, that was 14 zeer old: wherfore the Jewes, that comen of Ysaacces lyne, ben circumcyded the 8 day; and the Sarrazines, that comen of Ysmaeles lyne, ben circumcyded whan thei ben 14 zeer of age.